“Gremo Napred” na “Novi Put”
Lipi moji i drage moje, eko mene i ovu šetimanu. Ma ča ne moremo bez te munjene politike? Kad san pisala o mačkarah, rožicah i Valentinovu, ni vas bilo ni čut ni vidit. A sad kad san se jeno malo ulovila politike, svi čitaju tetu Rožu! A ma, ku vaš ta sakramenska politika toliko interesira, moremo i ovi put o njoj…vero, materijala nan ne fali, a blizu su nan i izbori pa će ga bit anke preveć. A to ča je pred izbore sve po onoj našoj staroj „Obećanje-ludom radovanje!“, na to smo se već navadili.
Nego, najprvo se moran škužat onistima ki su me kritikali u zadnjoj kolumni. Marinica moja draga, niman ti ja nič protiv nikega, samo san morala malo poškercat na račun profesora Gabrića i Hercegovci. Ja vajka rečen, ni važno ki je otkuda nego ča je i kakov je čovik. Moreš bit i črn i žut, Rus i Merikan, Hercegovac i Istrijan…ma samo je jeno važno-da budeš čovik! Jer, ili si čovik ili si blago! Pa budimo judi svi skupa i provajmo svi skupa malo rinut ovisti naš brižni Pazin baren jeno malo naprid.
Ben, kad smo poli blaga, se moran škužat i šjoru Nevenu Rimaniću. Vero nisan znala da ste partili ća iz Spomen doma i šli malo van grada na frišku ariju. Šjor Rimanić, ja san vas jako štimala kad ste bija gradonačelnik, ma vas štiman i sada. I vas i sve te vaše ki delaju u AZRRI. Ma, vero ste imali pravo da ste ušli van iz grada…samo sad bin morala malo popravit zadnju kolumnu, onu o kurbariji na gracken vijeću, pa moran reć, da se sada jeno malo manje dela u Spomen domu ku nisu tamo već ti judi iz AZRRI ča čuda delaju za našega boškarina. Šjor Rimanić, mi bimo se mogli nać koji dan. Ja ću prontat bocu dobrega domaćega vina, a vi donesite malo tega boškarina pa ćemo napravit jenu štabelu užinu da se više ne jadite na mene.
Nego, da se tornamo na izbore. Ja vajka rečen da bimo morali imat izbore baren jedan put na leto, pa bi nan naši političari manje obećivali svega i svačega. Ne bi nas mogli držat za trubile jer nanke mi stariji ne bimo pozabili ča su na obećivali. A tako, ki vrag se domisli ča je ki govori pred četiri leta i ča je riva napravit i uzidat, a ča ni. Ma eko, nas je domislija mali Blagonić ki bi stija bit novi gradonačelnik, ča je naš Renatić obećiva kad smo ga zbirali. Da, ma Sandić je študijan i pametan čovik, pa se domisli, a mi malo stariji se domislimo samo da nan ti starački dom obećivaju već tolike izbore i još ga ni. 
I sada ću ja tako javno neka svi vide i čuju na iPazin pitat Sandića: Će bit ča od tega staračkega doma ili neće? Da znan kamo da se zapišen. Ja bin jako rada pod stare dane ostala u Pazinu, ma ku ne bude staračkega doma ću morat partit u Motovun ili u Nedešćinu…kamo me budu uzeli. I ku mi Sandić obeća da će uzidat starački dom, ili samo počet da baren vidimo fundamente, oni put ću glasat za njega. A ako mi ne obeća…ćemo vidit kega će teta Roža zaokružit kad bude šla na izbore.
Ben, si je napisa Sandić da je za Novu viziju i za Novi put! Lipi moj otrok, daj ti nan kakovu novu tvornicu da judi imaju ča delat. Dosti je bilo puti i kružneh tokovi. Će nan se zavrtit u glavi od tolikega kruženja. Ter put su ašvaltani skoro za u svako selo. A za kega? Judi ne greju već na delo ki ga nimaju, jedino ča brižni starčići laglje greju poli doktora po švaltu nego po batudi.
A tu novu viziju od Sandića nisan jušto kapila. Ča je to ono ča Sandić govori da će nan u Pazin dopeljat umjetniki svake foze, pa će oni piturat i delat umjetnost po gradu i to tamo di je najveć zapušćeno? A tega nan u Pazinu ne fali, svaka druga hiža je zapušćena. Forši to nanke ni slabo, samo da ti umjetniki naprave lipe fasade i zide. Neka nan nacrtaju sunce, boške i rožice i pituraju s kakovin veselin piturami, samo da ne šaraju one vrajže grafite. To mi se ne pijaži nanke malo.
Ja ne kapin tu mulariju ki voli šarat po zidi svakakove štupidece. Neki dan san šla na kurijeru i gledan onu našu brižnu autobusnu. Je brižna sama po sebi, pa je još onako pošarat. A se domišljan da su naši mladi lipo bili piturali one zide. Neki dan su namontirali anke one plave stolice da mi ča ne moremo puno stat na nogah imamo se kamo sisti. Ben, su te stolice ustale kako višak od lani kada je bilo ono boćanje od Europe u Pazinu. Ma neka su, su hi pametno iskoristili. Dobro je da oni ki su naručivali te stolice ne znaju matematiku ni brojit pa su hi kupili jeno malo preveć. I sad su nan dobro došle za autobusnu. Forši će podurat koju šetimanu dok hi mularija ne porazbija.
Eko mi je preskočilo na novu stranicu, pa se moran frmat. Su mi rekli mladići od iPazina da preveć ćakulan i da se jeno malo kalman.
Samo za kraj ću reć jenu: GREMO NAPRED s našin Renatićen, na NOVI PUT s našin Sandićen. Samo….se pitan di ćemo finit?
Vaša teta Roža Ćakulonka
Prošle kolumne tete Rože Ćakulone:
Rožica za Valentinovo (13.02.2013.)
Mačkare, korizma i zoo (21.02.2013.)
