Kurbarija na gracken vjeću
Judi moji ma ste vidili ke kažin su neki dan napravili ti naši pazinski političari? Do sad san si mislila da su munjeni samo oni u saboru, ma mi se pera kako i judi govore, da su svi političari jednaki, i oni veli i ovi naši mići. Govori se i da je politika kurba, a to ča je bilo neku večer na gracken vjeću je jušto jena vela kurbarija!
Ma ste čitali na iPazin ča delaju? Umisto da delaju svoje delo i reču ča misle i dižu one svoje kartone, ki će zelene ZA, ki će crvene PROTIV, ili pak ku ni sami ne znaju ča misle oni put žute. Ne, oni brižni bižiju van kad rabi glasat. Ma ča smo si to izabrali da nan vode grad i da nan naprave ča bojega? Sram hi more bit! Veli, veli sram!!!
Najprvo hi ni bilo dosti u vjećnici. Ben dobro, niki su bolni, niki delaju pa ne moru svaki put doć. I su se opravdali. Znan ja da šjora Lucija Paro drži reda i sve pod kontrolon. Ma nake ona ne more frmat te štupidece koje neki naši političari delaju.
Da van pravo rečen ja to sve skupa ne kapin do kraja. San pročitala na iPazin dva puta ča je bilo, pa san šla na Internet od Glasa Istre, ma tamo ni bilo nič. San pogledala i na oni istarski.hr, a tamo pak piše sve ča i na iPazin. Mi se pera da je to bilo, kako se moderno reče ono kopi-pejst. To san se naučila od svojega zeta (ku niste pročitali, najdite onu moju prvu kolumnu, pa ćete znat sve o meni i mojoj familiji). To van je kako smo nekad mi govorili: pljukni pa zaljepi. Tako su napravili i ti na ten istarski.hr.
Ben, kako san ja kapila, je rabilo izbrat novu šeficu od Spomen doma. I u Spomen domu je neko upravno vjeće, ča bi reć da ono upravlja. Ma to ste sigurno već pročitali na iPazin. Tamo, u ten vjeću su mali Čubrić i Stanko Mališa bili protiv da Sonja Matijašić (to van je žena od Ugeta Matijašića, ma to svi znaju) opet bude šefica. A oni drugi su bili za to da Sonja još malo bude šefica. I sad, je trebalo naše Gracko vjeće reć će bit Matijašićka još malo šefica ili neće. I kad su trebali reć, ma ke reć? samo su morali pokazat svoje kartone, zelene, crvene ili baren žute. I onda Renato Kalac i oni profesor Gabrić nisu znali ča biju, ku zeleno ku crveno, pa su se kako dvi sirotine pobrali van. I tu je štorija finila. Jer kad se glasa na gracken vjeću mora bit kvorum. Mora bit već od pol tih naših zastupniki da bi ono ča glasaju bilo pravo. A Kalac i Gabrić su se veja prenuli od šinjore Matijašić pa su ušli doma svojim ženami. Ma ku imaju koliko toliko štabele žene, se nadan da su hi štabelo ukrpale kad su došli doma.
Ma ne kapin nanke to zač nebiju više Matijašićku za šeficu od Spomen doma. Govore da slabo dela. I da se je sudila z jenom učitelicon od muzičke jer njoj je dala otkaz. Ben, to da se nekemu da otkaz ni nanke malo lipo. Tako su rekli i na sudu. Pa je Matijašićka morala opet tu učitelicu zet na delo i platit njoj velike šolde. Koliko se domišljan, je to bilo nekih 700-800 miljari kun. Veli šoldi, da. Ma hi ni Matijašićka dala iz svojega žepa nego iz blagajne od Spomen doma. A šolde u tu blagajnu dajemo svi mi skupa.
A da se u Spomen domu slabo dela, eee, tu se ne bih složila. Svako malo u Spomen domu sjednice delaju političari od županije. Jako čuda delaju anke oni iz AZRI-ja. Su rivali spasit našega boškarina da se ne zatare. Ma ste provali one šalame od boškarina? Svi gušti ovega svita! Delaju čuda anke one mlade u knjižnici. Ben, knjižnici više ni šefica Matijašićka, nanke muzeju. Sad su sami za sebe i lipo delaju…i pametno gospodare z šoldima koje dobiju. U Spomen domu su i novinari od Glasa Istre. Pa neka mi ki reče da oni slabo delaju. Kad god san u gradu, a san svaki dan, vidim Šišovića, Rimanića i malega Anđela kako teču naokolo i pišu svega od Pazina u Glasu Istre. Dela i disko u Spomen domu. 
Tamo san hodila kad san bila mlada, a sad svako toliko čitan na iPazin da je svakakovih koncerti. Pogledan koji put i video iz diska, samo moran pazit da ne potrošin preveć na internet. (Anke to mi je reka moj zet…za te neke giga miga bajte). U disku su bili anke oni munjeni iz Rike ča si meću rože u guzicu. Vero bin hi bila šla poslušat (da, ma i vidit koju lipu mušku guzicu), ma me je bilo sran da gren med onu mulariju. U Spomen domu se more i kafe popit poli one lipe i prave male od Smokovića. Jedan put je bila i butiga u Spomen domu, ma kako i sve butige z kineskon štracarijon, se je i ta zaprla. Ni za to kriva Matijašićka. San čula da u Spomen domu dela i mali Marečić, sin od Rite i pokojnega Tilija. Ben, ne znan jušto ča on dela. Su mi rekli da dela neko delo ča su mu ga zmislili kad već ni bi u našen gracken poglavarstvu, još dok je kapo bi Rimanić, brat od novinara Rimanića. 
Anke ti Rimanić dela sad u Spomen domu, u AZRI-ju. Čovik se kapi u blago, je za to hodija na fakultet, pa i on čuva našega boškarina.
Eko vidite da se čuda dela u našen Spomen domu. I san pozabila reć koliko delaju one brižne čistačice. Ča mislite da je lako čistit onolike pode, zahode, pa ukna ili usisat našu lipu veliku dvoranu ča smo je nanovo napravili kad su je ona tri trubila zapalili. Oni Tarik, pa oni ćelavi i oni mali, sin od Ivice Vidovića. Tisti mali je misli da bi moga bit mađijoničar pa nan je načeni štabelu škodu.
A koji put je u našen Spomen domu i kakovo kazalište ili koncert. Niman čuda šoldi pa ne moren poć svaki put, ma da znate ja van jako volin kad se dela kazalište. Samo, mi se preveć ne pijažiju ti novi ki delaju kažin… samo kunu i govore porkarije,. A di je ono lipo kazalište od jedan put? Gospođa ministarka i takove stvari? Tu se je čovik moga nasmijat. Samo, Gospođa ministarka je Srbijanka, a svi znamo da se od rata ne volimo nanke malo.
Je svako toliko i koji koncert. Svako lito u dvanajsten misecu gren najprvo na koncert od invalidi. Ben, njima se plati, ma mi ni teško dat za njih koju kunu, neka si i oni brižni ča zaradiju. I su si zaradili i kupili jeni luši kombi. Pred Božić gren na koncert ki ga dela naša limena glazba. E to je prava i vesela fešta! I se ne mora platit! Gren i na koncert od zbora, ma on je u crikvi, ni u Spomen domu.
Ben, ste sad vidili da se čuda tega dela u Spomen domu! I od svega tega Matijašićka napuni blagajnu i vajka kad dojde na vjeće reć ča su delali, plače da nimaju šoldi. Ne znan kakova je to gospodarica.
Joh je meni, ma san tega napisala. Ma veja van nisan dosadna?
Još samo da rečen oko te gospodarice od Spomen doma. Reču da ženska drži tri kantuna od kuće. Bimo rekli da je i Spomen dom nikakova kuća. 
Samo ča ima malo preveć kantuni, pa su se neki i raspali, hi ne riva Matijašićka sve držat. Forši bimo mogli puštit Matijašićku za šeficu i zbrat još jeno dvi-tri ženske, pa da svaka drži svoja tri kantuna. Vero je u Spomen domu tih činovnic, neka anke one pomoru držat te kantune, pa bi bilo sve u redu. A Kalac i Gabrić ne bi morali bižat van iz vjećnice…ili forši imaju strah od ženskih na položaju ma ne smiju to reć? Kalac je bi u vojski, a tamo je malo ženskih. A Gabrić je mi se pera niki Hercegovac, a forši njihove žene moraju stat kuco i ne drže kantune?
Vaša teta Roža Ćakulonka
Prošle kolumne tete Rože Ćakulone:
Rožica za Valentinovo (13.02.2013.)
21 komentara na “Kurbarija na gracken vjeću”
Komentiranje je onemogućeno.
ok, Roža Ćakulona, provala si napisat četiri kolumne. Ova ti je došla na tir i mogla si bit zabavna, ali ajde ili se malo opameti ili prestani pisat. Ovo s Hercegovcima ti je dno dna. Pogledaj, kako je zanimljiva Šjora Špija, isto ćakulona, ali s mrvon soli.
Dobro rečeno,ali da vas ispravin cjeli spomen dom drži(čisti,mete,usisava,nosi stolove samo ca jos ne dela delo domara…za vjerovatno kikiriki) jedna,jedina čistačica koja ima forši 40 kg s mokron posteljon.Pa se ljudi zapitajte ki vodi spomen dom.
Da se nadodan, ta ista cistacica, uz navedeno, mora glumit portira na predstavama, domacicu na izlozbama, nebin reka da je SKORO domar, vise je nego ni. A cisti anka u muzickoj skoli, vodi se je po pazinu kako lijpei plakate, ili raznosi postu. Ca to su dela od cistacice??? Me interesa dali joj placa pasiva priko 3000kn, sa svin prekovrenima, a mi se vidi da gi nabere. Jer na godisnjen ni, vajk se je vidi delat. A sve to je slika sefa. Ni nega lipa slika, ca bite vi rekli?? Bitno da je njoj(sefici), i onima ki je zberu dobro, a cistacicu ko sisa…..
A ča bi to reć????
Da ni kurbarija samo u Gradskom vjeću.Nego i u
Spomen domu!!!!
A čuj znaš da Sonji i oslalim princezama dole u uredima bi pala kruna s glave da si nešto same naprave ili imaju strah da ufalo slome nokat.To ti je vaj tako uvjek će običan radnik morat delat ko tovar za 3 od njih za smješnu lovu morat ce bit sretan da ima delo i ispunjavat svaki hir takvim šefovima koje ja nemoren nazvat ljudima nego G…ima.
Forši šinjora Roža,ni tao velika špija
pa ne zna da je jedna
spremačica(sada tako zovu čistaćice)otišla u
penziju,druga u muzej.
A na trećoj je Spomen dom i muzička škola!
Sramota! neka sebi smanje plaću i zaposle još jednu spramačicu!
Zato u upravi imamo ravnateljicu, dvije u računovodstvu, tanika i pročelnicu za kulturu. 5 naprama 1, imaju i dva kućna majstora.
Prestanite olajavati i učinite nešto hvale vrijedno i uplatite svaki bar po 10 kuna ili kupite i donirajte hranu za životinje, osjećat će te se bolje i vrijeme će biti bolje iskorišteno.
hahahhahaha
Ma kadrovska struktura tog Učilišta je iz bivšeg jugo sistema. Danas sva djelatnost funkcionira na drugim postavkama.Ili ne funkcionira… Potrebno je prvo usložiti novu kadrovsku politiku koja će garantirati nove trendove “preživljavanja” ustanove.
Koji bi to bili trendovi? Iskreno me zanima.
Poštovana Roža Ćakulona,
kako svaka prava ćakulona vajk mora malo dodat ili oduzet da bi ljudi više bili zainteresirani za temu, tako ste i Vi malo gađali poli metu. Agencija za ruralni razvoj Istre, AZRRI iz Pazina već od 2010. ne obitava u Sp. domu, već dela u unajmljen prostoru u staren macelu poli školu. Ovi ki to piše ima delo na razvoju projekta Centra na Gortanoven brigu, koji bi do 5-6 miseca to leto otpra edukacijsku kuhinju i novouređene kancelarije u 1. zgradi na ulasku u St. Camus, a do kraja leta forši i okonča izgradnju nukleus farme za Istarske goveda (Boškarine).U Sp. domu je sada odjel za poljoprivredu sa pročelnikom i fond za razvoj poljoprivrede, pa me vjerojetno zbog tega dosta puti vidite tamo u radno vrime i forši ste zaradi tega žbaljali, a forši i niste. Hvala svejeno, ča ste mi indirektno omugućili da prezentiran ča u ovo vrime delamo u Pazinu.
Pa anonimus to bi bili vanjski izvori financiranja., samofinanciranje za određene programe… Što je SOnja kategorički na vijeću odbila kazavši da to nije njen posao da traži naokolo novce za instituciju. U svakoj normalnoj firmi onaj ki neće delat dobije otkaz., zašto bi POU Pazin bila iznimka?
Lula i mene živo zanima koji su to vanjski izvori financiranjaTko bi to mogao financirati? Gdje naći te novce? Tko je to? Uvesti cajke, i sl. Ja vidim jedino tu novce jer ruku na srce muzički ukus većine ljudi je srozan. Pa onda cajke, Zečić i sl?.
ako kao jedino rjesenje za vanjske izvore financiranja vidis cajke, onda nemamo o cemu raspravljati.
Ti tako pametan ili pametna, predloži konačno nešto konkretno, možda nađeš izlaz iz te situacije. Ne branim nikoga samo me
smeta izrugivanje, naklapanje i sl. Daj ti konačno neki pametan prijedlog.Dakle prijedlog ne diskutiranje, neka svi čujemo odnosno pročitamo.
Odgovor za .
Natjecaji ministarstava (kultura, turizam), natjecaji turistickih zajednica, natjecaji hepa, nexo grupe, adris grupe i na kraju natjecaji EU-a. E sad., ako ti neznas sta je to onda ne pitaj gluposti.
E sad kako? Edukacija traje cijeli zivot, pa neka pucko plati sonji edukaciju kako napisat projekt pa se mozda i odvazi za taj korak ali treba biti malo i kreativan i osmislit program van onoga sta se vec pucko godinama reklamira kao suorganizator a suorganizatori su samo zato jer daju prostor i ciste. a izlaz vidim u tome da sonja ide u penziju i da se neki uhvati posla. Jer sonja je javno izjavila da nije njen posao da trazi lovu van proracuna grada. e upravo Za taj posao je ona placena a ne za bit lipa. Kuzis tocko?
Kužim ja puno toga samo ne kužim ča tri smeta da je ženska lipa?
U gradu su zaposlili portira pa su mogli nekoga tko će raditi takve projekte, a ako postoji zašto taj ili ta ne traži novce okolo na način iznešen gore, s obzirom da to ipak nije privatna firma nego ako se ne varam u vlasništvu grada. Ima puno ljudi i s doktoratom pa isto ne bi znali tražiti novce iz EU i sl. a vjerojatno ni ti.
Dobro tocko, vidim da sa objasnjavanjem stvari necu puno tega napravit. Ili si rodbinski povezan ili imas nekakve koristi od sonje.
A sta ce radit onda sonja ako ostali uumjesto nje rade posao? Pa ne treba nam onda ravnateljica., nje nema na poslu vec mjesecima i pucko je do sada prezivljavalo i bez nje. :)
Ako sam ja rod, što si ti onda? Koristi nemam nikakve nego to olajavanje i ruganje općenito me smeta.