Mačkare, korizma i zoo

Mačkare su nan finile i došla je korizma. Dva dana se je tuta forca govorilo čega će se ki odreć, i pokle…Adio mare, svi pozabe na korizmu. Kako i vajka, vidili smo na televiziji sve one velike batice i svakakove glumice, pjevačice i manekenkice ki su rekli da će se odreć slatkega, alkohola, cigaret, TV-ja, a neki anke Fejsa.

Lipo, nego ča! Samo nikako da čujemo da će se niki političar odreć baren pol plaće, a vero bi koji mogli anke cile koliko delaju. Ma, meni se pera da bi najboje bilo da se odreknu fotelje, boje za sve nas i za ovu brižnu državu. A ove z estrade, sve mršave kako palice, pa govore kako neće jist slatko. Ma brižne, ter su same kost i koža. Ča njin ne bi bilo bolje da se odreknu štupidec koje delaju od sebe i te silne štuke i piture ča pomeću po sebi?

Ja, da van pravo rečen, neću se odreć ničega. Ma ča se ne odričen cilo lito i cili život? Slatko volin, pogotovo čokoladu i čokolatine, pa još one ča imaju malo maraškina ili konjaka u sebi! Mama mia, ke gušti, kad ti se rastopi u usti. San si neki dan kupila dvi škatule tih čokolatini, su bili na akciji, samo van ne smin reć u kojoj butigi ki bi to bila reklama, a tu poli nas na iPazinu ni reklamah, samo za one ki plate. Kako reču Nema džabe ni u stare babe!

Anke zafuman, ne čuda ki su te sakramenske cigarete preskupe…ma kakovo je to kafe ku ne zafumaš?

Vero se neću odreć ni TV-ja. Ma ča da brižna delat uvečer? Moran si pogledat Sulejmanića.

Maškare_vrtić_OŠ (29)A mačkare? Da ni one lipe dičice mi u Pazinu ne bi nake znali da su mačkare. San bila oni petak na Placu kad su bile miće mačkarice. Ma prepreprelipo! Ma kokošice z jaji, borići, hižice, rožice, mornari, pa Spajdermeni, Supermeni i svega drugega. I sve su to dičica sama načenila z svojimi tetami u vrtiću i učiteljicami u školi. A ste vidili naše učiteljice ča su bile medicinske? Ma nisan vidila da nanke jena ima kakovu špuntu, samo su nosile kartone, a je bilo i doktoric koje su imale one slušalice za poslušat pluća. San čula da su se tako mačkarale radi onega zdrastvenega odgoja oko kojega su se stabelo posvadili popi i ministar Jovanović. A forši je koja od tih medicinskih u žepu imala koji fudrin, samo ga je skrivala, pa će pokle dici u školi pokazat kako ga se vrže na krastavac ili bananu.

Ja van vero ne kapin zač se je toliko govorilo oko tega zdrastvenega odgoja ča ga pišu kratko ZO. Ku mene pitate sve to skupa je bilo jedan veli ZOO, ča će reć žološki vrt, samo ne znan ki je tu majmun, ki slon, a ki noj. Nu, znan, znan, samo neću reć, ću držat za sebe!

I da se još malo tornan na mačkare. Imali smo te mačkarice iz vrtića i škole na Placu, a u ponedijak kad je bilo ono jako grdo vrime je bi i mačkarani koncert dice iz Mužičke škole. To van je tamo di je glavna ona mića Barbarica, od Vinka i Pavice Stihović iz Lindara. San pensala poć i to vidit, ma je bilo preveć grdo…daž i snig cili dan, pa san ustala doma. Ma san pole čitala na iPazin i gledala slike. Anke je bilo lipo, samo je došlo malo ljudi zbog vrimena.

A ča je s tin drugima? Ča niki ne voli mačkare? Ča smo svi pozabili kako je to veselo i lipo? „Mačkare, ča mogu mačkare…“  Vidin ja po gradu kakovu mačkaranu mladu, ma govore da to je moda. Ma ke vražja moda je usta piturat u črno ili zeleno? Ili ubuć kratke brageše preko žabic? A ma…

ruhcipustJedini ča su još imali mačkare su oni iz Ruhci. Vero je i njima šlo štrambo. Kako i svakega lita, poli čestu su napravili Velega pusta. Ovisti put je to bija Štrumf. I je zapuhalo malo bure i njihov Štrumf je finija na guzicu, pa je tamo sidija kako neka brižna sirota, kad san ga vidila mi se je zaperalo kako da si je jeno malo preveć popija. A da su bili pametni bi bili napravili Štrumfeticu tidamtidamtidam! Nju jeno malo bure ne bi hitilo na guzicu, samo bi njoj se malo digla kotulica pa bi njoj se vidile mudantice i bi bilo veselo. A ku bi bila bez njih još veselije!

I tako se je u Ruhci užgalo tega Štumfa ča je pa na guzicu, a poli nas u Pazinu se ni užgalo nič. A ma, veja nan je svima sve dobro u Pazinu, sve same rožice. Ili forši nan je svima skupa jedno velo NIČ, a kako zapalit to NIČ?

Vaša teta Roža

Komentari
Najčitanije u 7 dana
Anketa

Jeste li zadovoljni dijelom proračuna o kojem odlučuju građani


Pogledaj rezultate

Prethodne ankete

Najčitanije u 30 dana

© iPazin.net portal 2001. - 2019.