Potpiši …pa zbriši…u Brisell

Dragi moji, ma ste vidili? Svaki put kad dojdu izbori se počne zidat naveliko i naširoko. Zida se tuta forca, zida se u planovima, zida se na harti, a dogodi se i da se kakova sitnica zaspravlje uzida. Ma pred izbore se najveć zida – na jeziku od političari.

Eko neki dan su naš gradonačelnik Renatić i župan Nino potpisali i rekli da će se zidat dvorana. I to ne bilo kakova dvorana. Bit će to i školska i gracka i sportcka dvorana. Ma neka se zove kako će, samo neka se finalmente uzida.

To van je ona ista dvorana koju smo zidali (na jeziku od političari) za feštu od naše stare gimnazije koja je bila 2010. leta. Se domišljan kako je Ferdo Tončinić vajka govorija kako bi bilo lipo da se dvorana uzida za tu feštu. Ma je došlo i 2013. leto, Ferdo je partija u penziju, a dvorane još ni vidija. Sva srića da je šjor Ferdo još mlad i da se dobro drži, pa će veja dočekat tu dvoranu.

90793640To van je anke ona dvorana koju smo zidali na parkiralištu zad Spomen doma. Samo su se naši političari jeno malo prenuli od tega pa su se predomislili. A ću van reć i zač su se prenuli.  Da bi nan dica mogli doć iz škole do te dvorane zad Spomen doma su njin mislili naši pametni političari napravit jedan tunel da brižna dica ne greju van škole po svakakoven vremenu. Vidite kako su škrbni naši političari, pa pensaju na dicu i njihov zdravje! Meni se pera da su se naši političari domislili one stare pjesme:

„U tunelu, usred mraka,

Sija zvijezda petokraka!“

I kad bi nan dica svaki dan hodila kroz ti tunel bi mogli vidit tu petokraku, a oni put bi mogli dignat i kakovu revoluciju kakove su dizali onisti ki su nosili zvijezde petokrake.

I na kraju je plan za dvoranu finija tamo di bi rabilo, a to je zad škole. Su imali naši političari malo problemi z jenon ženskon koja tamo ima zemju i je stila čuda šoldi za nju. Pa hi je i dobila. Ben, ne moremo reć da je ta ženska bila pokvarena, je prodavala svoje i je mogla iskat koliko je je bilo voja. Ma, meni se svejeno pera da je mogla tu zemju dat jeno malo cenije kad je za naše mlade.

RENATO_KRULCIC_IVAN_JAKOVCIC_REGIONAL_EXPRESS_(2)Ma i to je pasalo. Zemju smo kupili, nacrte i planove smo napravili i sad bi rabilo počet zidat. Eeee, ma kad greš zidat oni put ti rabi sakramenskih šoldi. Lipe šolde je naš Renatić pobra od države, svaka mu čast! Je reka da će nan država darovat deset miljuni. I neka da. Nismo ni mi u Pazinu trinajsto prase. Ma sad nan fali još dvajset miljuni. A za to ćemo dignat kredit. Ma ne samo mi Pazinjani, nego ćemo kredit dignat skupa s županijon. E to mi ni nanke malo pravo. Judi moji, dizat kredit s Nineton Jakovčićen? Ma ča niste vidili kako ga je vrga svojoj bivšoj ženi? I ta nima sve kokoše doma kad mu plaća kredite. Ma nu, to su njihovi posli.

Mene je samo strah da nan ga Nino i nan ne vrže kako i ženi. Zato bin ja kako ozbiljna i pametna ženska koja je svega provala u životu savjetovala našen Renatiću da, kad bude ša u banku potpisat kredit išće neka se zna ki i koliko plaća od tega kredita, jer z Nineton Jakovčićen, mi se pera, nikad nisi siguran kad su krediti u pitanju. Pa neka se lipo zna ki mora ča plaćat, a ne da čekamo kako sirote večeru zad vrati. Jer ča ćemo mi brižni delat kad nan Nino parti u Brisell i pozabi na kredit. Ku je zajeba svoju ženu, nemojmo puštit da i nas!

A z drugega kraja, brižnega Nineta mi je jeno malo i žal. Čovik bi dela, popravlja stara sela i svega drugega, ča je sve lipo, samo za sve to rabi šoldi. Pa se je Ninić zadužija preveć. Dosta ga je vidit i zajno ti je ćaro da nima ni žene ni šoldi. Vajk ubučen po brižno, zgromačan, a frizura mu je kako da se sam šiška doma pred špegljon. I se je grdo udebelija, kako oni brižni ki ne jiju štabelo.

Zato, Renatić moj, čuvaj se Nineta i kad regale nosi!, jer Ninić da će partit u Brisell (je reka da su anke Slavonci potpisali za njega), a nan će kredit ostat. Da nebimo i mi bili zgromačani i bez frizure, a forši i bez mudanti!

Teta Roža Ćakulona

2 komentara na “Potpiši …pa zbriši…u Brisell”

  1. bibo napisao:

    Draga šjora,
    ovo tekst je, ruku na srce, ispod vašeg nivoa. Osvrnite se malo na vlastiti budžet ili stanje u državi pa recite mirne savjesti da je situacija ista kao i 2009. ili ranije. Ako smatrate da se ništa nije promijenilo na gore, onda živite u nekoj iluziji. Stoga je i svaku investiciju teže dobiti, a ovakav projekt, ako se već odlučilo ići u njega, je hvale vrijedan. Da ne bi poslije bilo rečeno da je to politička odluka – sve političke i nezavisne opcije bile su za njega, jednako tako i javnost, na svakom koraku. I, kad se već krene u takvu investiciju, onda smo svi u njoj, bila dobra ili loša.
    Lokacije za dvoranu su se tražile zbog visoke cijene, alternativnih zemljišta i puno drugih problema (moguće i zbog nesposobnosti ponekih pregovarača), ali to je život…
    Moram na kraju reći kako ad hominem pristup nije prikladan vašem članku. Jer, vi možda imate ružno lice, na primjer, ali to ne znači da ste loša osoba. Manite se ćorava posla, frizura, žena tuđeg života. Ima pametnijih riječi od toga.
    Puno sreće u budućim tekstovima, znali ste dobro zagrist neke škakljive teme.
    p.s. na vašoj sam strani. :)

  2. . napisao:

    Ova šjora Ćakulona, zaista je dosadna i neoriginalna pa bio to IDS, HDZ ili netko drugi. Malo originalnosti ne bi štetilo.

Komentiranje je onemogućeno.

Komentari
Najčitanije u 7 dana
Anketa

Jeste li zadovoljni dijelom proračuna o kojem odlučuju građani


Pogledaj rezultate

Prethodne ankete

Najčitanije u 30 dana

© iPazin.net portal 2001. - 2021.