Lipi moji, belece mie, eko i mene!

Ja san Roža, trda Pazinka i po materi i po ocu. Govore da san Ćakulona, ma meni se para da nisan…samo volim znat ča se dela i ča je novega u našen lipen Pazinu. Vrimena iman, dela niman, muža san imala ma ga već niman, san ga otpravila. Hćer se je lipo i bogato uženila, Boh njoj daj zdravlja!…i ča drugo delat nego poć do markata, jedo malo na plac pa kamo na kafe i svega čuješ i vidiš. Reču da triba bit informiran…i ja se informiran i na markatu i na kakovoj ćakulici. Ma anke pročitan novine, naš Glas Istre, pero na internetu drugi dan (da, da…iman ja i kompjuter, nemojte parat da san toliko brižna). Pogledan našu Tv Istru, pošlušan ča govore na radijo Istri, a prvo san slušala i radijo Pazin, ma otkat ni unega mićega Brajkovića tamo niki nič ne govori, samo sviri po cile dane.

Ben, kako san dobro informirana san si rekla „Roža, danas svaki šturlo ima svoju kolumnu, biš je moral i ti imat!“ I lipo san našla te bruvne mladiće ča delaju naš lipi iPazin i njin rekla kako san ja jena štabela i dobro informirana šinjora po pitanju pazinskih čakula, kako sve vidin i sve znan…anke ono ča ne piše u novinah i da bin mogla ja bit njihova kolumnistica. Ku more ona stara Žuži pisat va Gloriji svakakove porkarije i judima govorit kako rabi delat one stvari, ter bin i ja mogla reć ništo pametnijega od nje.

San van već rekla da dela niman. San delala i to štabelo, ma je fabrika šla svragon i san i ja dobila ubrticu i partila tamo zad Pasaja na onisti SIZ poli one Suzane, jako prave ženske i čekan leta da bin dobila onu mižeriju od penzije. Ma nake sad ja ne stojin za nič. Dela je samo ko ćeš delat. Eeee, dragi moji, ima i u Pazinu šinjor ke imaju šoldi i ke čuvaju svoje nalakirane nohte, pa njin ja počistin hiže, uperen stakla, popeglan košuje od muža i se ćepa koja kunica. Znan ništo i ušit, pa svako toliko kemu skratin brageše, vržen novu lampu ili ča pokrpan…i eko, još koja kunica. A će brzo doć i sezona, i Roža je pronta za poć čistit apartmane po Poreču i di god rabi. Ni mene strah delat, vero ni. Dok je zdravja vajk se more ćepat ča šoldi.

Muža san otpravila. A-a, ne rabi Roži pijanac i lakodelac u hiži. Ku već voli bićerin i briškulu nego mene neka parti. I je parti! l to na svetega Valentina 2003. leta. Ću si napravit feštu za deset let ča san ga hitila van. Ma ča da van rečen? Čekan ja tega Valentinova 2003. leta da mi donese baren kakovu rožicu. Lipo san se regulala, prontala, vrgla čiste lancune, upalila par kandelic po kamari…i čekan ja i čekan, a njega ni. Pa san si natočila bićerin-dva orahofca dok ne dojde…i blago je došlo doma trdo pijano u 11 i pol ur zvečer. Kandelice su zgorile, orahofca već ni bilo i me je ćepalo takovo trentauno. San ćepala pakljunicu, stirala ga van i sve njegove štrace hitila van kroz ukno. Je bilo dosti čakul po Pazinu, a ma…su pasale. Boje sam nego slabo kumpanjan! reču. I vero imaju pravo. Nu, nisam ja jušto jušto sama. Ću van reć, samo pazite pred kin govorite, aš je svakakovih lajavih babah po Pazinu. Iman i ja jenega mladića, ma je uženjen i moramo se držat šakreto. Dojde kad riva uć od žene, pa se malo pokokolamo. Govori mi on da mu žena ni za nič, samo štuk i pitura. U večer da dojde u posteju sva namačkarana…noćna krema, maske, toniki i sve te štupidece po sebi. On bi, a ona mu ne da. I eko, tu je Roža koja mu zgušton da. Ma san van rekla, stanite kuco, da ne bi bilo čakul po Pazinu, aš Roža je jena štabela i poštena ženska.
Tako da znate, lipi moji, ne pozabite kupit tu vrajžu rožicu ženi za ovo Valentinovo. I ne hote u oštariju baren tisti dan. Kupite kakovu lipu rožicu i partite doma. Žena će bit kuntenta magari će ta brižna rožica krepat za dva dana, ma ju je lipo dobit. A forši ćete i vi mladići moji, na račun te rožice dobit ono od žene! I zato manje pit i trdo sprida!
Ja ne znan ku će ovisti moj mladić rivat doć. Ma ni mene briga za nekakovu rožicu, ma bin rada da on dobije moju „rožicu“!
A ja ću po rožicu poć na plac ili na markat. Drage moje, ku niste sigurne da će van se muž domislit hote i vi. Ku niki drugi će nam rožicu darovat naši IDEESOVCI kako i svako leto. Lipo ću se prontat i partit rano zjutra i čekat. Forši će naš gradonačelnik darovivat rožice. Ha, ma su blizu izbori i treba se pokazat. Ja ću svoju rožicu pobrat, a ću i bušnut našega lipega Krulčića. A dok dojdu izbori…ma ki će se domišljat neke brižne rožice!

Evo lipi moji, dosta za prvi put! Ku van se pijaži ovista moja kolumna Svaken loncu pakrov pišite mi na iPazin, pa ćemo se čut još koji put!

Vaša teta Roža Ćakulonka