Zidam kuću trokatnicu

„Zidam kuću trokatnicu,
miješam malter, motam žicu,
da nam živi, živi rad.“

E da, tako su nam pjevali oni iz Magazina pred ravnih 25 let. Oni put je još tamo pjevala ona Ljiljana Makedonka, ča je pokle šla u Ameriku. Pametna ženska! I je znala pjevat, altroke danas tamo neke Ivane ili Jelene. To je bila muzika, smo plesali i kantali tuta forca. I u toj je pjesmi bila i ona srpska glumica Olivera Marković, i je govorila nekakove porkarije. Ma svejeno je bila prava glumica, gušt je je bilo gledat! Da…sam čula da je brižna umrla. A ča ćete? Svih nas čeka put na oni drugi svit.

Nu, san stila reć ništo drugo. Naš gradonačelnik Renatić Krulčić je anke reka da će zidat kuću trokatnicu. Finalmente! Se prontivaju skoro koliko i Magazin kanta, pa bi bilo vrime da se i uzida ta kuća trokatnica. I to za one kojima najviše rabi, a to su naši mladi ki bi se ženili i dicu delali. Neka si konačno i oni kupe koji svoj kvadrat stana. Samo…ne znan, nisan pametna. Govore da će delat dvosobne i trosobne stanove, a ja ne znan ki će to moć kupit. A ča je s garonjerami? Njih ni, ne u našoj trokatnici. Moreš birat ku ćeš 53 ili 74 kvadrata, ma ku ti rabi manje, neće ići!, kako bi rekli naša mlajarija. Ben, svima rabi malo već, ki će se stiskat u garsonjeri, rastizat kauče kad rabi poć spat ili delat dicu ku nisi sam u kamari…samo, rabi to i platit.

POS plakat Govore da će bit jedan stan u prizemlju, su napisali da je dvosoban, i da će bit za kojega invalida. E sad, ne kapin ni to. Za one ki su zdravi dvosobni stan je 50 i ča kvadrati, a za invalide samo 38? Ma judi moji, a ste računali da je forši tisti invalid u kolici i da mu rabi malo već prostora nego zdravima? A petnajs kvadrati je jena štabela kamara. I kako sad to? Dvosoban gori, dvosoban doli, a doli petnajs kvadrati manje nego gori!

I mi se pera da ti kvadrati u toj našoj trokatnici nisu nanke malo jeftini. Su rekli da će bit po 990 euri. Dobro da nisu vrgli 989,99 ili još huje, 999,99. I još su se pohvalili da će Pazin dat svoju parcelu poli benzinsku i da se neće morat platit komunalno. A veja neće grad platit sam sebi? I zato mi se pera da su mogli vrć i jeno malo manju cjenu. Ča ni moglo bit najveć 899,99? Bi naši mladi veselije šli u banku po kredit i ušparali koji euro.

Krulcic, Miletic i FlegoNe znan kako Puležani moru prodavat po 895, a Umažani 899,80 eura? Renatić moj, umisto da se svađaš po novinah z Miletićen iz Pule, bi bilo boje da si ga ša pitat kako oni moru zidat za 100 euri manje nego mi u Pazinu. I još je Krulčić reka da će jedan dio cjene oni sami platit kad prodaju poslovne prostore koji će anke bit u našoj trokatnici. Sva srića! Samo se pitan koliko bi koštali ti kvadrati da ni tih prostori za butige i druge stvari? Ma, anke je pitanje ku će to rivat prodat? Ki će si kupit butigu ili forši kancelariju svragon tamo gori poli benzinsku? A u gradu se malo-malo zapre koja butiga!

A to se sve skupa zove POS. Tega se je domisli oni pametni Čačić koji je reka da manje telefoniramo pa da ćemo već šoldi imat. Onisti Čačić ki ne zna peljat veturu, pa je pomasti onu brižnu fameju u Mađarskoj. I će partit malo u pržun. Ministar ili ne, pržun ga čeka! Anke tako je štabelo profita, jer da ki drugi ki ni ministar, ubije kega z veturon bi dobija 22 lita, a ne 22 miseca. I sad još govore da mu je i to preveć, jer da je Čačić brigadir HV-a i da mu je Mesić da nekakov orden. Ma judi moji, kega vraga sad tu ima veze vojska i orden i to ča Čačić ne zna peljat? Tar mu ni Mesić da orden kako štabelen šoferu nego zato ča su svi ništo dobili pa je mora i on dobit kakovega. A dobija je Red kneza Domagoja s ogrlicom. To nisan nikad kapila, te redove, pletere, ogrlice i druge monade. Ma kapin da bi Čačić mora dobit ogrlicu i to onistu ča se zaplete oko nog, pa neka ima i pleter, a ne samo ogrlicu. I da se mene pita, još bi mu rabilo vrć i onu želiznu balotu da ne ujde. Govore da bi mora doć u Valturu. Pa neka tamo pomuze i koju kravu. Samo neka mu ne daju trahtor jer će napravit kažin anke u pržunu!

Eko, san morala malo reć ča mislin i pokritikat, ma svejeno je dobro to da se ča počme zidat u Pazinu. I se šperan da ćemo bit pametni i da će našu trokatnicu zidat naš Šipraka i njigova Usluga. Ku su mogli uzidat oni veli Pasaj, će moć i jenu trokatnicu. Pa će i tako naši šoldi ustat u našen gradu….samo je pitanje u čigoven žepu?

E…i na kraju ove štorije da ne pozabin reć-brzo su izbori!

Vaša teta Roža Ćakulonka

Prošle kolumne tete Rože Ćakulone:

Rožica za Valentinovo (13.02.2013.)

Mačkare, korizma i zoo (21.02.2013.)

1 komentar na “Zidam kuću trokatnicu”

  1. starr napisao:

    Ča se mene tiče moru i novi neboder uzidat ali bi bilo bolje da uzidaju koju tvornicu koja će donest više penezi nego prazni stanovi

Komentiranje je onemogućeno.

Komentari
Najčitanije u 7 dana
Anketa

Jeste li zadovoljni dijelom proračuna o kojem odlučuju građani


Pogledaj rezultate

Prethodne ankete

Najčitanije u 30 dana

© iPazin.net portal 2001. - 2023.